مكنونا تعز الثقافة تعز العز تعز تقاوم لما خرّبوها.. قل لهم بلا جنان.. ثلاثة مليون تعزي خارج تعز كيف شكون مصيرهم

المستقلة خاص ليمنات

 ـ جاءوا الجن وشلوا الجن.. وبعدها جاءوا جن الجن وشلوا الجن، ولليوم ونحنا مع جن الجن.. اللي كانوا مع الملكية رجعوا يحاربوا المملكة.. واللي كانوا مع الجمهورية ومع عبد الناصر رجعوا يتحالفوا مع المملكة مكنونا تعز الثقافة تعز العز تعز تقاوم لما خرّبوها.. قل لهم بلا جنان.. ثلاثة مليون تعزي خارج تعز كيف شكون مصيرهم

 جميل الحمادي.. جميل الروح، وطيب القلب.. حيوي، نشط، لقن، ينبض بالحياة رغم حصار الموت والقصف اليومي وظروف الحياة ومصاعبها.. جميل أحد أبناء هذا المجتمع المهمش والمكافح الذي يستحق الحياه بكرامة.. جميل يلخص لكم في هذا الحوار بجمل مكثفة بالرمز والدلالة والتصريح كثير من معاناة هذا المجتمع المكافح واحتياجاته واحتجاجاته.المستقلة خاص ليمنات

حاوره/ أحمد سيف حاشد

• أيش اخبار تعز؟!

– أبي كان يعجبه الأسماء والأوصاف.. سماني جميل وأنا مش جميل.. الآن تغيرت الدنيا ما عاد باقي إلا قبيح القبيح.. أخبار تعز هكذا.. مكنونا تعز الثقافة تعز العز تعز تقاوم لما خرّبوها..

• أيش تقصد ؟!

– أقصد ابن عمتي حلاق سعما انا.. خاطي بالشارع.. قصفوا ابوه بقذيفة قصمته نصفين.. أفتهم لك.

• ما رايك بعمليات السحل والحرق والتمثيل بالجثث اللي حدثت بتعز؟

– قول لهم بلا جنان.. ثلاثة مليون تعزي خارج تعز كيف شكون مصيرهم.. شلفلفونا مثل الأدمم، من قال موه قالوا هذا من تعز.. قول لهم لاوين تشتوا تودونا!! قل لهم يبطلوا جنان.. بيقع ثارات وانتقامات في كل مكان.. القتال دمار وخراب.. يقولوا علينا حضاريين ومثقفين وإلا لا.. مو رجعوانحنا الان نتقاتل بينا البين.. نحن أخوان من صنعاء وإلا من تعز.. خبَّرني واحد من صنعاء قلي رحت بريطانيا ومعي زلط ومعي كل شي.. بس كنت اشتي واحد مثقف فاهم يفهّمنا لغة الجن هاذولاك.. يأكّلنا ويشرّبنا ويخطّينا.. خرجت وقلت يالله بمخارج.. سمعنا واحد جنبي من تعز.. قال مو .. قلت له جي جي انا فدالك.. تعال خارجنا مع الجن هذول.

• بس أنصار الله تقول لاوين يشتوا يودونا؟

– أنصار الله لو دخلت معاهم وسايرتهم ناس طيبين جدا جدا.. الدنيا هذه الأيام حرب يا قاضي..

• أيش قصدك؟

– امي قالت اهدر طارف طارف وإلا شقتلوا عارك.. هذول ما يبننوش..

• طيب الثورة أيش أخبارها؟!

– جاءوا الجن وشلوا الجن.. وبعدها جاءوا جن الجن وشلوا الجن، ولليوم ونحنا مع جن الجن.. يعلم الله كيف المستقبل بهذي البلاد..

• تقول لاوين سايرين؟

– لو أجينا عند الصدق الصدق هي مخبوصة معصودة .. فلتت.. والله العظيم انها فلتت.. والله ماحناش خالصين من الموال هذا خالص.. جاء باسندوه وقلنا سلام الله على عفاش، وجاء الحوثه وقلنا سلام الله على باسندوة، والان جت داعش وبانقول سلام الله على الحوثه.. كل ما جاء وقت قلنا سلام الله على اللي قبله..

• كانت صورة عبد ربه على الجدار في محلك ليش نزعتها؟

– جاني واحد مطوع قال لي ما يدخلوش الملائكة المحل اللي به صور، قلت له قطّعها وقطّعها.

• هل انتخبت عبد ربه؟

– ايوه.. ما رضيناش نصدقك يا قاضي.. انتخبت عبده ربه خوفاً من الدماء اللي وصلنا لها اليوم.. غلطة امس نحصدها اليوم..

• من الغلطان؟

– الكل يحتاج كرت أحمر..

• يقولوا إن الأمة تنقسم إلى 73 فرقة كلهن في النار ما عدا واحدة.. من هي الفرقة الناجية من النار؟!

– نحنا المدعسين..

• هل تفكر تحج هذه السنة ؟ 

– من وين لنا الزلط نحج..

لو حجوا أنصار الله بنحج معاهم بالبنادق.. الحجاج بيرموا الشيطان بالحصى وإحنا وانصار الله بنرميه رصاص.

• ما رايك بالذي حصل من 2011 لليوم؟

– قلدك الله علي صالح فاسد وعيال الاحمر ثوار..

• ما رايك بالزعيم؟

– الزعيم مدرسة بالانتقام.. من 2011 لليوم أنتقم من الكبير والصغير.. ربشها على الكل.. ركض المزمار ركض، ورقّص الشعب كله.. كل اللي كان يقوله وصلنا له.. قالوا له ارحل. قال من يرحل!! ورحلوا الخُبره كلهم وهوه جالس.. قال لهم اعلِّمكم فن المعارضة، وقرحهم مثل الطماش، الحكومة والرئاسة والمعارضة. طيرهم كلهم.. قال اربطوا بطونكم بتموتوا جوع، ومتنا جوع.. لا كهرباء ولا ماء ولا غاز ولاعيشه ولا جن ولا عفاريت.. رمّضنا بالغدرة وعيّدنا بالغدرة.. وذلحين ركّب دقنه.. في94 ركب دقنه ووقعت الحرب الاولى.. ولما زار قبر أبوه وجده وقعت هذي الحرب، والآن ركب دقنه ثانية يعلم الله موه وراها. .. الخط عنده ماسك.

• من يعجبك من السياسيين؟

– اللي يعجبني من السياسيين عبده الجندي وبس.. حتى ثوار 2011 ما يزعلوش منه.. يسمعوا مؤتمراته للآن.. انا احب عبده الجندي لأنه يتكلم واقع وباللهجة العامية.. يا اخي هذه الأيام السياسة خباص.. الجندي قال لمصلحتك تتحالف مع الشيطان.. ما قلش تتحالف مع داعش..

• أيش رأيك بداعش؟

– ماليش علم .. داعش والقاعدة بالنسبة لي بم .. خط أحمر ما أتكلّمش عليهن.. معانا جهال يا قاضي.. عبده الجندي قال القاعدة ما تصافطش

• ما رأيك بالإخوان المسلمين؟

– ناجحين بالجمعيات الخيرية والتجارة.. أما بالسياسة والحكم فاشلين.. فاشلين.

• ما رأيك بتعويم المشتقات النفطية؟

– انا ما أعرفش أعوم .. التعويم بجولة عمران وشارع خولان.. طرمبة وقاطرة والدبة بـ 8 الف ريال .. بالنسبه لنا المواطنين ما نحصلهاش لأنه ما يعطوش الا أصحاب السيارات..

• وأخبار الدولة ايش؟

– دولة على حلاق..

• أيش تقصد؟

– سرقوا الدبة الغاز حقي ومحد عملّي حاجة.. عصابه نسوان يدخلين المحلات على اساس يشحتين سرقين الدبه الغاز وراحين.. انا ما خليت بالي لأن العرض كان معاهم حالي.. مو اقلك ..الإغراء.. زادين علينا وراحين.. ما مجريتوش أسجل بلاغ.. مو قلهم سرقونا نسوان.. زادين علينا نسوان.. رجعت اشتري دبة من واحد وجاءوا العسكر وشلوني القسم.. قالوا كيف تشتري من سارق.. قلت لهم اشتريت من واحد معروف ابوه معه عمارة اربعة دور.. قالوا الابن جاهل.. قلت لهم الأبن بالغ سن الرشد.. قالوا بلا لقانة ودخلونا السجن.. قلت لهم النسوان سرقين الدبة الغاز حقي مش لقانة ولمن اشتريت دبة غاز قالوا لقانة.. كيف هذا القانون ضدي وماهوش معي .. قلنا لهم داخل السجن موذنبنا المشترين.. أندولنا بيسنا وشلوا الغاز عادي لكن نسجن ليش قالوا «مالك واللقانة احتبس ..

• كيف حال الامن والأمان هذه الأيام؟

– عندنا الجامع أمان.. ونحنا بالمحل في امان والشارع امان..

• هذه الأيام عادك تصلِّي بالمسجد؟

– الحمد لله ولا اخلي فرض.. هذا المسجد موأمّن 20 متر من الجهة الجنوبية و20 متر من الجهة الشرقية بعد السيارة المفخخة اللي فجرتها داعش بجانبه..

• هل ترددوا الصرخة في الجامع؟

– ايوه.. عند صلاة الجمعة بين الخطبة والفرض يرددوها، وانا ارددها معاهم.. ماعاد فيش بالمسجد إلا احنا .. الباقي رجعوا جامع (الصحابة) حق الإخوان.. أنا من مِسك عندي فأنا معه.. من شل مربعنا انا معه.. هذا المسجد كان من قبل مع الفرقة وبعدها مع الاصلاحيين وبعدها رجع مع الحوثي!!

أول كان الخطيب سلفي وبعدها واحد إصلاحي.. وهذا اللي يخطب اليوم ما كانش حوثي كان مؤتمري وبعدين تحوّث من باطل الاصلاح.. وهذي الأيام ناس رجعوا اصلاحيين من باطل الحوثه..

• لما وقع انفجار السيارة المفخخة.. أين كنت؟

– كنت جنب الباب حق المحل.. تعورت بشظية بالجنب حقي .. تعورت وتعور محلّي.. خسارتي خمس مية الف ريال من بيجيبها لي.. عملنا بلاغ بالقسم عند انصار الله وعلى الله.. الانفجار يقولوا قتل اثنين وتعوروا عشرة انفار من الجيران واثنين من برع.

• لما كنت طالب أيش المادة اللي كنت تحبها أكثر بالمدرسة؟

– كنت أحب مادة الرياضيات لأنها فيها حسابات وما تدّخل بالسياسة..

• والتربية الإسلامية؟

– الاصلاح سيسوا الدين ماخلوش منه حاجه إلا وسيسوها..

• ومادة العلوم؟

– العلوم على فايز العبسي هو متخصص فيزياء.. الآن قده من أصحاب الدعوة..

• مو قلبه من الفيزياء للدعوة؟

– هذا الأيام كلهم قلبوا.. اللي كانوا باليمين رجعوا يسار واللي باليسار رجعوا يمين.. اللي كانوا مع الملكية رجعوا يحاربوا المملكة.. واللي كانوا مع الجمهورية ومع عبد الناصر رجعوا يتحالفوا مع المملكة ويحاربوا معها..

• أيش من قنوات فضائية تتابع؟

– اتابع قنوات المسيرة واليمن اليوم، اما العربية والجزيرة أتابعهن أحيانا بعد القات لما اكون طافش..

• وكيف تسوي بالكهرباء؟

– الكهرباء ماهلهاش، ما نعرفيش إلا باليومين ساعة.. عندي ماطور وشاحن وكل شقانا في الكهرباء..

• إلى صف كم درست؟

– درست لأول ثانوي وما قدرت اكمل بسبب ظروف المعيشة.. التعليم أصبح اليوم اي كلام .. كله وساطات وقوة وعنترة.. الآن التدريس فالت.. الوظايف ماهلش.. الدولة ماهليش.. الله يا قاضي لو ترجع البلاد زي ما كانه زمان!!

• إن شاء الله تكون أحسن.. هل من كلمة أخيرة تشتي تقولها بهذا الحوار؟

– عند الله وعندك يا قاضي لاعاد تعورنا ..اكتب حاجة سطحية وجزعتلك.. معي جهال ومعي أسر أشقي عليهن.