من مغاني بنات الريف
المستقلة خاص ليمنات
سافر حبيبي والقليب محروف
طفران سرح ما فيش بجيبه مصروف
مودعين بالله وارحاله
أنتم رحلتم والدموع ساله
خلّي سرح ما قلتلوش مودع
في داعة الرحمن يروح ويرجع
خلي سرح وسرحته تبكي
واحسرتي بعده مع من ادكي
يا وحشتي بعد الحبيب من لي
يا فرقتاه ويا دموع هلّي
يوم السفر يا ربنا تلاطف
العين تدمع والقليب راجف
يوم السفر يا حسرة المفارق
سيَّب حبيبه بالدموع غارق
مسافرين الله يعين سفركم
لا من سنة لا اشترجعوا بلدكم
مسافرين خلوا السفر لباكر
وشجعله ربي رعود وماطر
مسافرين خلوا السفر لبكرة
وشجلعه ربي غمام وغدرة
مسافرين قولوا لخلي الزين
يغيب على الخاطر ما غاب عن العين
مسافرين قولوا لمن هجرني
لمو نسى عهده ولا ذكرني
شتودعك والدمع فوق الاوجان
بحفظ ربي واكحيل الاعيان
شتودعك وانا حزين مكبود
شوقي رعود وابو نماس مفقود
شتودعك وابكي عليك زيادة
واسكب دموع وابلل الوسادة
الله معك في الباخرة وفي البر
رب السما يا خل قسم وقدّر