وما العدوان الا انتم ..

يمنات

علي البدوي

سمحوا بإدخال الاجهزة وتركيبها ووسعنا، وكان في بعض الاماكن يضرب العدوان البنيه التحتية للاتصالات ويقوموا اصحاب الشبكات بتغطية العجز و ايصال الانترنت للأماكن التي تضررت.

وبعدين يجي يقول لك خلاص لاعاد تشتغل انت بتساعد العدوان؟

في ايش بين اساعد العدوان لاني وصلت خدمة الانترنت للمناطق التي عجزت انت عن ايصالها؟
يقول لك انت سوق سوداء؟

طيب وانت ليش لليوم ما سمحت لي بترخيص والا انا مثلي مثل مقاهي الانترنت .

يقول لك اسكت واشتغل وانت ساكت؟
تمام ما انت لاعاد سمحت بدخول اجهزة وجالس تشوه وتكذب وتستخدم كل الأساليب القذرة واخس من العدوان بتحاربنا.
يقول لك اسكت والا انت مع العدوان؟

واضح من هو مع العدوان اللي يحارب الشعب في مصدر رزقه ويضيق الحرب الاقتصادية عليه.. اليس هذا هدف العدوان اللي فشل في الحرب والميدان رجع يحارب الشعب اقتصادياً.. الستم مع العدوان وتنفذو له مخططاته ومن الداخل ايش تشتو الشعب يموت جوع؟ فين يروحو اكثر من 15 الف شاب متعلمين حاصلين على اعلى الدرجات الدارسية.

تشتوا نسكت ورب محمد لن نسكت وما العدوان الا انتم وانكم اصبحتم اخس والعن منه على الأقل العدوان قد احنا عارفين له وعارفين مخططاتهم ولهم خمس سنين واحنا صامدين بس انتم اللي في صفنا وبتنخرو من الداخل.

هذا حقي ورزقي ولن اسكت والقادم اعظم استمرو بس في طغيانكم وتعنتكم ومهما طال الزمن لابد للحق ان ينتصر.

للاشتراك في قناة موقع يمنات على التليجرام انقر هنا

لتكن أول من يعرف الخبر .. اشترك في خدمة “المستقلة موبايل“، لمشتركي “يمن موبايل” ارسل رقم (1) إلى 2520، ولمشتركي “ام تي إن” ارسل رقم (1) إلى 1416.