إثباتات وأدلة على تحالف الحوثي مع صالح

يمنات
صجيتمونا عن هذا التحالف وكأن الثوار عميان وطرشان ما بيمشوا إلا بعكاز صالح وشور الراعي، ذلحين قدا أنا تجسست على مكالمات وتوصلت إلى هذه المعلومات، بس خلوها سرية بيني وبينكم: صالح متحالف مع الحوثي والدليل وجود خصومه في دار الرئاسة، صالح قد تحالف مع الحوثي وإلا شوفوا أين الأغلبية حقه المريحة بمجلس النواب، صالح من زمان متحالف مع الحوثي و اسألوا الوفد الإعلامي الذي زار صعدة، صالح يحب الحوثي قوي والشاهد قعشة إب، صالح يدعم الحوثي وأدخله صنعاء، بس الحوثي هرول لما وصل إب وقال له صالح خلاص ارجع اشرح لي كيف الهرولة.
صالح ما كان يريد يقضي على الحوثي، بس علي محسن ربط صالح وقال له اعلن حرب وسميها الأرض المحروقة وعلى ضمانتي نجتثهم بدون ما نقضي عليهم.
صالح كان قادر يرجع الحوثي إلى مران بس علي محسن مارضيش، صالح كان يشتي يحكم ابنه أحمد وأستخدم الحوثي سلم بس هادي رفض وفحط عدن.
صالح قرر مع الحوثي يقتحموا عدن بس الإصلاح نصب صواريخ بعيدة المدى لمواجهة أي استعمار جديد لعدن، صالح أتفق مع الحوثي و أرسل مليشيات حوثية متنكرين بزعانف وقشور من حق السمك لاحتلال عدن لكن مليشيا حسن أبكر وجماعة الحنق تصيدتهم واحد واحد والآن هم في قبضة فؤاد دحابة يجري معهم تمرينات رياضية..
صالح يا جماعة خلوا له حاله فذكرى اسبوع الشهيد ومعرض اكسبوا مازاد خلاه يطعم النوم، لا تصدقوا هنجمته والفحاط حق أول أمس، هي إلا بس حركات يوجع قلب ذي قد غدغدوه.
المهم حذروا محمد قحطان لا يزيد يهددنا إذا ما سرنا بعدهم بايتحالف مع صالح ونرجع نصيح من جديد إرحل إرحل.
أما أصحاب تكتل الإنقاذ أمانه قد حنبوا وما عاد معهم حل إلا يربطوا كل الذين أعلن عنهم بمشاركتهم بهذه الفضيحة، لأن بعض أحزاب هورة تشتي لقاء مشترك وتشتي دعم قطري وفاعله رجل بالمشترك ورجل بالتكتل وحيث الفائدة تجثم فوقها لما يسمعوا الناس الغارة والزعيق.