فتحي بن لزرق
يمنات
فتحي بن لزرق
من أمس وانا جالس اقرأ حدة المشاحنات بين جنوبيين على خلفية الأطراف المتنازعة بخصوص قضية المطار.
كل طرف يتخندق مع طرف أخر ويحاول الدفاع عنه وتصويره بأنه “الجنوبي الوطني” اللي ماحصلش زيه أبدا.
و الحقيقة وان كانت مرًة هي ألا وطني واحد بين هؤلاء .. كلهم كبيرهم “شاقي” بمصروف يومه..!
كل أو الأغلب من نراه على الساحة “شقاة” منهم من بالأجر اليومي وفي بالشهري وفي كمان بالقطعة أو بالعملية..
كنا نظن بعد الحرب اننا بنشوف دولة وقيادات ونسجنا احلام كبيييرة لكن الواقع طلع “خمبقان”..
اعرف ان الكلام صادم وممكن يزعل البعض لكن يجب قوله لأن كل “الشقاة” مجتمعين ممكن يسوقونا إلى التهلكة إذا مافي حد عقّلهم.! ممكن يضيعوا “عدن” والجنوب والناس وكل شيء بس لأنهم يدافعون عن مصروفهم “اليومي”، لأنهم وكلاء أطراف تتصارع وتملك مليارات وحاسة بفراغ شديد ولا شيء يمكن يملاه إلا شوية الاكشن والاقتتال بعدن، ناس مش ناقصها شيء ملت من الفراغ والبلاستيشن وحابة تشوف شيء حقيقي على ارض الواقع.
اكبر شنب في “عدن” اليوم يلتطم بوجهه في الغرف المغلقة وبعد اللطم يرموا له رزمة فلوس ويخرج زي الديك المبلول ينفش ريشه على مجموعة شباب يوفر لهم حق الصرفة ويفحط بهم كم شارع بعدن يوميا وينفذ بهم عملية هنا او هناك (أتحدث عن كل الأطراف).
وقع الصراع في المطار لأن مافي قيادات جنوبية تملك قراراها ولا في قيادات جنوبية تملك “سيادة” حقيقية على الأرض، و لا في قيادة تملك قدرة اتخاذ قرار حقيقي..
كل طرف تلقى اتصال اتحرك ورجالك وإذا جأكم الطرف الثاني اخبطوا ابوه.
طبعا مافي حد منهم سأل ليش.؟ و على ايش..؟ و ليش اساسا نتقاتل..؟
خسارة..
لو قدر لك تجمع قيادة فصيلين من اللي اشتبكوا بالمطار او بغيره بعدن او اللي بيشتبكوا مستقبلا وغلقت عليهم غرفة واحدة وجلست تبحث حول ايش هما مختلفين..!
اقسم بالله لن تجد شيء يختلفون حوله.
لكن اذا انفردت بكل طرف منهم بيقولك ان الممول تبعه قال له اتحرك واتحرك فين..؟ روح قاتل صاحبك واخوك وزميلك بالجبهة وبالوطن وبالاخوة..!
لحظتها تحس انك بحاجة إلى ان تصفعه وتبصق بوجهه.
تجي لمواقع التواصل الاجتماعية والفيس وتلاقي كل انصار طرف يحاولون تصويره بأنه “فارس قضية الجنوب” الذي لايشق له غبار.
تلتفت لواقع الحال تلاقي ذا الفارس يمشوه بالريموت كنترول ومش لاقي مصروف جيبه..
فين القضية ياجماعة اذا؟
القضية ان الشعب ذا لازم يفهم ايش اللي صاير بعدن ..
خريط “جنوب” ماجنوب اللي يحاول البعض يصور ان طرف من الأطراف بجيبه لكم بكيس كله (كذب) .
اللي حاصل صراع مصالح ونفوذ ومسلحين واطقم ومدرعات وماله أي صلة بقضية جنوب ماجنوب .
الجنوب ذا مش موجود برؤوس الجميع .. ماهلوش
ومش الجنوب وبس ، حال الناس وضعها الكهرباء – المياه – رواتب الناس واشياء كثيرة لا احد يهتم بها ابدا..
لذا نصيحة مني للناس العادية لاتحرقوش دماغكم باي صراع في عدن لاتخسروش بعض لاتتهاتروش وخليكم بوضعكم وحياتكم وربنا يعينكم جميعا.
خلونا نشوف حل للكهرباء والصيف اللي جاي – خلونا نشوف حلول للجرحى والمرضى والناس المعذبة والمقهورة خلونا نتكاتف بعيدا عن كل هؤلاء لعل وعسى نغير شيء بحياتنا.
للاشتراك في قناة يمنات على التليجرام انقر هنا
يمنات
