لعن الله كل شخص يشوه عدن بتعامله مع المسافرين

يمنات

ماجد الجماعي

لي يومين من حين رجعت من عدن واشتي اكتب عن موقف حصل لي اثناء دخولي عدن وما اقدرت اعبر عن هذا الموقف بطريقة مناسبة..

المهم بكتب لكم ما حصل لي بالتفصيل :

وصلت بعد العشاء انا وصديقي ، صديقي يسوق وانا راكب جنبه قدام ، وصلنا احد النقاط الغير رسمية ، قال لنا احد افراد النقطة من فين واجيين ؟ قلنا من إب ، فين رايحيين ؟ قلنا المطار نستقبل واحد.

قال طلعوا بطايقكم وجنبوا السيارة ، جبنا له البطائق وجنبنا.. انا ضنيت انه اجراءات امنيه مثل النقاط اللي قد مرينا عليها.. 

المهم بعد ما اخذ البطائق وجنبنا ، نزلنا من فوق السيارة وفتشنا وفتش السيارة ، جا ومافيش حاجه.. قال جيبوا ارقامكم ، جبنا ارقامنا ، بحث عليهن بكاشف الارقام ، جا وكل شي تمام مافيش حاجه.

قال لي جيب تلفونك ، قلت له اتفضل ، اخذه لايده وقال لي افتح الرمز ، فتحت له الرمز.. دخل سجل المكالمات وقائمة الاسماء والرسائل SMS وفتش كل حاجه ، جا ومافيش حاجه.. دخل الماسنجر ورجع دخل الوتساب ، الشاهد الله انه اقتحم كل خصوصياتي ، انه دخل وفتش كل المحادثات حتى المحادثه حقي انا وخطيبتي ، جا ومافيش حاجه.. وقد مرت يمكن ساعه ونص ، وقدنا مازل من العرق يقول واحد الا اتغسلت ، اشهد لله ان حتى ملابسي قد كانين خاسعات عرق من قوة الحماااا والتوتر.

المهم بعد ما خلص قلب التلفون قلب ، عاد كان باقي معرض الصور.. فتح معرض الصور وفتش وقلب المعرض قلب (حصل لقطة شاشه لمنشور عادل الحسني عن الجحافي) وهنا بداء اسالته وتهديداته .. تعرف عادل الحسني ؟ قلت له اعرفه من الفيسبوك ، هل تتواصل معه ؟ قلت له لا ، قد شفت كل المحادثات حق الماسنجر بعينك ، وبعدين ما اتواصل معه ما اريده ، انا مش ساكن بعدن لو نقول اوصله معلومات او شي ، وهذي اول مره بحياتي انزل عدن اصلا. 

قال وليش اخذت لقطة شاشه لمنشوره ؟ قلت له كذا هباله مني مع الترند اللي حصل بالفيسبوك من سب الجحافي، قال ما يهمك انا الليلة بوديك عنده.. الان اتواصل مع العمليات يجوا ياخذوك ومدري ايش وتهديدات .. قلت له يا رجال الله المستعان مش للحد هذا على لقطة صورة انا ما ارتكبت جريمة ، قال الا لقطة الشاشه هذي بتوديك في داهيه.. 

المهم ارعبنا والله، وبدل الفرحه اللي كانت بقلبي من اول ما خرجت من إب لاننا نازل عدن ، اتحولت الى ندم وكنت اقول بيني وبين نفسي ليت والله وانا مانزلت عدن ..

بعدين قال خليك هانه وخلي صاحبه جا جنابي وهو راح جناب صاحبي لا فوق السيارة خوفه شويه ، قله صاحبك معه بلاوي يدخل بحاجات ماله علاقه بها ومعه لقطات شاشه ومدري ايش..

وصاحبه اللي عندي قال لي شوف له صرفه واتخارجت احسن ما يحلبطك هنا ومدري ايش ، انا من الخوف والتعب والارهاق حق السفر قلت له تمام بشوف له .

المهم بعد ما راح خوف صاحبي شويه رجع لاعندي ، وانا قلت له خلانا نشوف لك مصروف ونمشي لنا ، قال كم بتجيب ؟ قلت له ما يهمك خلنا بروح جناب صاحبي اشوف كم معانا وبجيب لك.

رحت جناب صاحبي لا فوق السيارة ، قلت له الخبره يشتوا مصروف ، عاد باقي معانا بيس قعيطي نجيب له !! قال والله ما ريال قعيطي باقي الا ميه سعودي ذي خليناها قلنا نوصل نتعشي ونصرف لما يوصل صاحبنا ذي نزلنا نستقبله ، بس مكنه الميه وقول له ياخذ له خمسين ويجيب لنا خمسين. 

المهم رحت جنابه وقلت له اقسم بالله مع معنا ريال غير هذي الميه الريال السعودي ، خذ لك خمسين وجيب لنا خمسين بنوصل نتعشي وندبر انفسنا بها لما يوصل صاحبنا.. وهو اخذها من يدي ودخلها جيبه وقال ان مش صرافه اصرف واجيب لكم خمسين ، قلت له طيب وكيفه والله مع في معنا ريال نتعشي ونشل لنا ماء ، قال دبروا انفسكم هذوا بطايقكم الله معاكم ، ولا شليت الميه وخليكم مجنبين.. قلت له خلاص جيب لنا حتى خمسه الف نشل لنا ماء مع نشتي عشاء ، قال ولا بجيب ريال. شليت البطائق من يده وقلت له امرك وحالك لله ومشينا. 

اقسم بالله ان انا مشيت وانا مقهووور قهر لا يعلم به الا الله. 

اما بالنسبة للنقاط الرسميه وباقي النقاط اقسم بالله انهم قمه في التعامل والاخلاق ، توصل عندهم يشوف بطاقتك ويسالوك الاسئله الرسمية من فين واجي واين رايح ، ويقلك الله معك.

المهم.. حفظ الله عدن واهلها ، وشكرا لابناء عدن ورجال امن عدن ، ولعن الله كل شخص يشوه بعدن وابناء عدن بتعامله مع المسافرين.