لو وصلنا لانتخاب رئيس بايدورو نووي يقصفونا ..

يمنات 

نبيل الصوفي

قرابة 100 طلعة جوية سعودية ضد اليمن، وهو عاده الا اجتمعت هيئة رئاسة مجلس النواب، طيب لو وصلنا لانتخاب رئيس، بايدورو نووي يقصفونا به والا كيف..

تعرفوا ايش حصل؟

ليش ماضربوش من أول اعلان مجلس تسيير الدولة؟

السفير السعودي قال لمفاوضينا في الكويت، البرلمان خط أحمر.. قالوا له ويش عليك.. وبعدين نحن بانجتمع مش بانقتحم المجلس.

وبعدين، كيف لاتشتونا نعمل انقلاب ولا نجمع البرلمان ولا نوصل لاتفاق، يجتمع البرلمان وقد كلنا سنسلم الدولة له.

تخيلوا السفير السعودي، يعتبر اجتماع برلمان اليمن، اعتداء على السعودية.. هيا وكيف، ياعيال الكبسة..

المهم، تحركت السعودية، بنصائح غربية، تلفلف الشرعية التي تتحدث عنها.. هادي قال لهم مافيش شرعية الا شرعيتي، طيب كم معك نواب؟

قال لهم، مايش معي احد، ولا اشتي حد، وزاد ان البرلمان مانفع صالح عاد الا باينفعنا نحن.. ها ايش ينفع طيب؟

اعاد حقه الهدره حق الدجاج، اللي وصف بها اليمنيين في اتصاله المشهور لبن مبارك، دقوهم بس، هم بايهربوا زي الدجاج.

راحوا لعلي محسن، اتصلوا بكل نواب البرلمان اللي قالوا مش شرعي.
اتخيلوا، نفس اللي عملوه عشان يكون معهم مؤتمر شعبي عام في الشتات، يحاولوا الان يعملوه مع البرلمان، ولا اتعلموا من فشلهم مع المؤتمر..

وفي الوقت اللي ماجمعش لهم علي محسن الا عشرين نائب، كان رد اغلب النواب، لا، وتفاوتتت المبررات بين ماينفعش برلمان منتخب في بلاد يعقد اجتماع في بلاد ثانية،الى: الرياض بعيدة، صنعاء لنا أقرب.

وفجأة تدرك الرياض ان صنعاء تملك عشرة أضعاف ما مع الرياض من نواب، وفيها هيئة رئاسة كاملة مكملة بكل عددها.