فال الله ولا فالك

يمنات

– ألف ألف ألف مبروك ياخي!
* الله يبارك فيك، بس على أيش؟
– كيف على أيش؟ لا تخبّوش علينا، لا تخافوش مابانمرعكمش، والله إن إحنا في كل المحافظات فرحنا لكم يا أهل صنعاء.
* الله يحفظكم، بس والله مانا داري عن أيش بتتكلم ياخي!
– ياخي قناة اليمن الرسمية والمسيرة واذاعة صنعاء وصحيفة الثورة وباقي الصحف والمواقع كلهن يتكلمين عن الانجازات اللي عملتها اللجنة الثورية اليوم في صنعاء، والحوثيين جالسين يتبادلوا التهاني ويشكروا اللجنة الثورية باسم الشعب، وقالوا ان الاحتفالات في كل شوارع صنعاء، وانهم بايطلقوا ألعاب نارية و”طلِّيع” بالمساء..
* أها، ذلحين فهمت.. ياخي لاتصدقش، الموضوع كله بكله اثنين حواجز تحت اثنين جسور بعدوها من مكانها وفتحوا الطريق!
– أنا عند الله وعندك ياخي، مش معقول يعملوا كل هذي الضجة على إزالة اثنين حواجز تحت اثنين جسور!
* والله ما أكذب عليك..
– طيب، ولو عادهم هم اللي بنوا الاثنين الجسور، أيش كانوا بايفعلوا؟
* يهيييييييييي،ما لوعادهم هم اللي بنوا الاثنين الجسور.. ياخي خلِّي لي حالي، فال الله ولا فالك!
من حائط الكاتب على الفيس بوك